न्यूयोर्क सिटीमा चिसोका कारण मृत्यु हुनेको संख्या १४ पुग्यो

न्यूयोर्क । भारी हिमपातपछिको बढ्दो चिसोका कारण न्यूयोर्कसिटीमा मृत्युहुनेको संख्या १४ पुगेको छ । शहरको तापक्रम निरन्तर रुपमा जिरो डिग्री सेलिसेस भन्दा कम छ । यो वर्षको चिसो एक दशक यताकै सबैभन्दा बढी भएको मौसम विदहरुले बताएका छन् । 
अत्याधिक चिसोका कारण एकसाताअघि आएको हिउँ पग्लन सकेको छैन । शहरको तामक्रम निरन्तर सिंगल डिजिटमा रहन पुग्दा विषेश गरी होमलेस नागरिकहरुलाई सुरक्षित गर्न सिटीका अधिकारीहरुलाई हम्मेभएको छ । घरविहीन व्यक्तिहरु चिसोबाट बढी जोखिममा परेका छन् । चिसोबाट बचाउन न्यानो सेल्टरहरु स्थापना गरिएपनि चिसोका कारण ज्यान गुमाउनेको संख्या रोक्न सकेको छैन । कार्यकाल सम्हालेको एकमहिनामा नै सहरबासीलाई चिसोबाट बचाउन नयाँ योजनाहरु ल्याउनुपर्दा मेयर जोह्रान माम्दानीलाई चुनौति बनेको छ ।
चिसोका क्रममा मृत्यु संख्या १४ पुगेपछि, मेयर माम्दानीले अप्पर म्यानह्याटनमा घरविहीनहरूका लागि ५० वटा नयाँ एक कोठे संरक्षण स्थलको स्थापना गरेको शनिबार जानकारी दिएका छन् । समूहगत बसोबासको लागि बनाइएको सेल्टरमा बस्न अनिच्छुहरुलाई राख्नको लागि एक कोठे सेल्टर निर्माण गरिएको बताइएको छ । गत आइतबार न्यूयोर्क सिटीमा झन्डै एक फिट हिउँ जमेको थियो । 
“हामी न्यूयोर्कवासीलाई घरभित्र ल्याउन सम्भव सबै उपाय गरिरहेका छौँ। यो पूर्ण रूपमा ‘सबै हात सहयोग’ शैलीको प्रयास हो।” मेयर माम्दानीले भने । हालसम्मा ८६० भन्दा बढी व्यक्तिलाई आश्रयस्थल तथा ‘सेफ हेभेन’ मा राखिएको र यस्ता स्थलमा राख्नका लागि हाललाई कतिपय नियमहरुमा सामान्यकरण गरिएको पनि मेयर माम्दानीले बताए । 
शहरले तातो बस्न सकिने ‘र्मिङ शेल्टर’ खोलेको छ, आश्रयस्थलमा भर्ना नियमहरू केही खुकुलो बनाएको छ, वार्मिङ बसहरू परिचालन गरेको छ, र आवश्यक परेकाहरूको नजिकै पुग्न १७ वटा ‘अन–कल’ एम्बुलेट÷एम्बुलेट–जस्ता सवारी पठाएको छ, माम्दानीले भने ।

मौसम विभाग अनुसार अत्यधिक चिसोका अवस्था अझै एकहप्ता सम्म रहने छ । अमेरिकाको दक्षिणपूर्वी राज्यहरुमा आएका हिमआँधी र बढ्दो चिसोका कारण हालसम्म १०० भन्दाबढी नागरिकहरुको मत्यु भइसकेको न्यूयोर्क टाइम्सले जनाएको छ ।