रास्वपा सभापति रवि लामिछाने पुनः पक्राउ

काठमाडौ । उच्च अदालतले जिल्ला अदालतको फैसला उल्टाएपछि राष्ट्रिय स्वतन्त्र पार्टीका सभापति रवि लामिछाने पक्राउ परेका छन् । उच्च अदालत तुलसीपुरको बुटवल इजलासले सहकारी ठगीमा लामिछानेलाई पुर्पक्षका लागि थुनामा पठाउन आदेश जारी गरेसँगै लामिछाने पक्राउ परेका हुन् ।
उनलाई बुढानीलकण्ठस्थित घरबाटै प्रहरी टोलीले नेपाली समय अनुसार शुक्रबार राति पक्राउ गरेको हो । अदालतको आदेशपछि प्रहरी टोली लामिछाने निवास बुढानीलकण्ठ पुगेको थियो । उनले विभिन्न बहानामा अलमल्याएपछि प्रहरी झन्डै १ घण्टा लामिछाने निवासमा बस्नु परेको थियो ।
उच्च अदालत तुलसीपुरको बुटवल इजलासले बुटवलको जिल्ला अदालत रुपन्देहीको यसअघिको फैसला उल्टाउदै सुप्रिम सहकारी ठगी र संगठित अपराधसम्बन्धी कसुरमा लामिछानेलाई पूर्पक्षका लागि थुनामा पठाउने आदेश गरेको थियो । लामिछानेलाई थुनामै राख्न माग गर्दै रुपन्देही जिल्ला अदालतको आदेश बदर माग गर्दै जिल्ला सरकारी वकिल उच्च अदालत पुगेको थियो ।
उच्च अदालत तुलसीपुर, बुटवल इजलासका न्यायाधीशद्वय रमेश ढकाल र स्वीकृति पराजुलीको इजलासले लामिछानेलाई धरौटीमा छाड्ने जिल्ला अदालत रुपन्देहीको आदेश बदर गरेको थियो । यो सँगै गोरखा मिडिया नेटवर्कका तत्कालीन सञ्चालक छविलाल जोशीलाई थुनामा पठाउने जिल्ला अदालतको आदेश पनि उच्चले सदर गरेको उच्च अदालत तुलसीपुर, बुटवल इजलासका उपरजिस्ट्रार हरिगोपाल ज्ञवालीले जानकारी दिए ।
प्रहरी स्रोतका अनुसार रवीलाई शनिबार कसरी रुपन्देही पठाउने तयारी छ ।