भीडमा गाडी चलाउने संधिग्द चालक पनि प्रहरीको गोलीबाट मारिए

न्यूयोर्क । लुजियाना राज्यको न्यू ओर्लिन्स शहरमा नयाँ वर्षको उत्सव मनाइरहेका मानिसहरुको भीडमा गाडी कुदाउने संधिग्द चालक प्रहरीको गोली लागि मारिएका छन् । गाडी चालकलाई गोली प्रहार गरी नियन्त्रणमा लिने क्रममा उनको मृत्यु भएको एफबीआईका अधिकारीहरुले जनाएका छन् । सो क्रममा दुई जना प्रहरीलाई समेत गोली लागेको स्थानीय सुरक्षा अधिकारीहरुले जनाएका छन् । नयाँ वर्षको उत्वस मनाइरहेका मानिसहरुको भीडमा डेलिभरी ट्रक चलाउदा कम्तीमा १० जनाको मृत्यु भएको छ भने ३ दर्जन भन्दा बढी घाइते भएका छन् । 

नयाँ वर्षको उत्सव मनाइरहेका मानिसहरुको भीडमा विहान सवा तीन बजेतिर उक्त घटना भएको सिटी अफ न्यू ओर्लिनले आफ्नो वेभसाइटमार्फत जानकारी गराएका छन् । स्थानीय उद्धारकर्मीहरुले दुर्घटनापछि उद्धार गरिरहेको र घाइतेहरुलाई नजिकका पाँचवटा अस्पतालहरुमा लगेको पनि वेभसाइटले जनाएको छ । 

न्यू अर्लियन्सका सरकारी अधिकारीहरूका अनुसार दुर्घटना बोरबन स्ट्रिट र क्यानाल स्ट्रिटको चोकमा भएको थियो, जुन शहरको फ्रेन्च क्वार्टरमा पर्छ। यस क्षेत्रको लोकप्रिय नाइटलाइफको कारण यहाँ सधैं ठूलो भीड जम्ने गर्छ । दुर्घटनापछि, घटनास्थलमा प्रहरी र आपतकालीन सेवा वाहनहरू परिचालित भएका छन् । भीडमा गाडी कसले चलाएको र कुन उदेश्यले चलाएको भन्ने अहिले सम्म सार्वजानिक भएको छैन । 
भीडमा अनियन्त्रित रुपमा एक ट्रक दौडाइएर दुर्घनता गराइएको न्यू ओर्लिन्सका प्रहरी सुपरिडेन्ट एनी किर्कप्याट्रिकले जानकारी दिएको द वासिङटन पोष्ट दैनिकको अनलाईन संस्करणले उल्लेख गरेको छ । प्रारम्भिक अनुसन्धानले यो दुर्घटना आतंकवादी गतिविधि नभएको र थप अनुसन्धान जारी रहेको ती प्रहरी अधिकारीले बताएका छन् । 

लुइसियानाका गभर्नर जेफ ल्यान्ड्रीले सामाजिक संजालमा पोस्ट गर्दै यो घटनालाई “भयानक हिंसा” भनेका छन् र पीडितहरूको लागि प्रार्थना गर्न सबैलाई आग्रह गरेका छन्। उनले आपतकालीन उद्धारकर्मीहरूको प्रशंसा गर्दै घटना स्थलबाट टाढा रहन सबैलाई आग्रह गरेका छन् । यो घटनाले शहरमा ठूलो शोक र चासोको माहौल सिर्जना गरेको स्थानीय अधिकारीहरूले जनाएका छन् । घटनको अनुसन्धान जारी रहेको जनाइएको छ ।