थापा नेतृत्वको नेपाली कांग्रेस वैधानिक : निर्वाचन आयोग

निर्वाचन आयोगले गगन कुमार थापाको नेतृत्वको नेपाली कांग्रेसलाई वैधानिकता दिएको छ । आयोगले विशेष महाधिवेशनलाई मान्यता दिदै थापा नेतृत्वको कांग्रेसलाई वैधानिकता दिएको हो । गएको पुस २७ देखि ३० सम्म काठमाडौंमा भएको नेपाली कांग्रेसको दोस्रो विशेष महाधिवेशनले चयन गरेको गगनकुमार थापाको नेतृत्वमा नयाँ कार्यसमिति गठन गरेको थियो । नयाँ नेतृत्व चयनपछि अद्यावधिक गराउन थापा नेतृत्वको टोली हिजो बिहीबार आयोगमा निवेदन दिएका थिए । त्यसपछि शेरबहादुर देउवा नेतृत्वको कार्यसमिति विधान विपरीत विशेष महाधिवेशन आयोजना गरिएको भन्दै वैधानिक्ता दावी गर्दै आयोग पुगेको थियो । १४औं महाधिवेशनले देउवाको नेतृत्वमा कार्यसमिति निर्वाचित गरेको थियो । 

आयोगले आज दुवै तर्फबाट प्राप्त कागजात, पार्टीको विधान तथा ऐन–कानुनको अध्ययनपछि गगन थापा नेतृत्वको कांग्रेसलाई मान्यता दिएको हो । आयोगले विधान बमोजिम ४० प्रतिशत महाधिवेशन प्रतिनिधिले विशेष महाधिवेशन माग गर्न पाउने र त्यही अनुसार महाधिवेशन आयोजना गर्नु पर्ने बाध्यात्मक व्यवस्था रहेको बताएको छ । आयोगले विधानतः महाधिवेशन प्रतिनिधि नै सर्वोच्च प्रतिनिधि हुने स्पष्ट पारेको छ । आयोगले विशेष महाधिवेशन माग गरेको विषयमा कसैको विमति नदेखिएकोले विशेष महाधिवेशन आयोजना विधानअनुरुप नै भएको उल्लेख गरेको छ । देउवा समूहले आयोगको निर्णयको विरोध गर्दै आयोग बाहिर नाराबाजी समेत गरेका थिए ।