नेकपा एमालेको अध्यक्षमा केपी ओली पुनः निर्वाचित, पदाधिकारीमा ओली प्यानलकै वर्चश्व

काठमाडौ । नेकपा एमालेको काठमाडौमा सम्पन्न एघारौं महाधिवशनबाट केपी शर्मा ओली पुनः अध्यक्षमा निर्वाचित भएका छन् । अध्यक्षका प्रतिस्पर्धी ईश्वर पोखरेललाई पराजित गर्दै ओली तेस्रो कार्यकालका लागि पार्टी नेतृत्वमा चयन भएका हुन् । ओलीले १ हजार ६६३ मत प्राप्त गर्दै विजयी हुँदा प्रतिद्धन्दी पोखरेल ५६४ मत प्राप्त गरेका थिए। । 

काठमाडौमा भृकुटीमण्डपमा भएको मतदान झण्डै २२ घण्टा लगाएको सकिए लगतै गनना शुरु भएको थियो । मतदानमा कुल २ हजार २ सय ६२ प्रतिनिधिमध्ये २ हजार २ सय २७ जनाले मतदान गरेका थिए । 
महासचिवमा ओली प्यानलकै शंकर पोखरेल विजयी भएका छन् । उनले १ हजार २ सय २८ मत प्राप्त गरे । ईश्वर पोखरेल प्यानलका सुरेन्द्र प्रसाद पाण्डेले शंकर पोखरेललाई कडा टक्कर दिदै ९९९ मत ल्याएका थिए । शंकर पोखरेल पनि लगातार दोस्रो कार्यकालका लागि महासचिव निर्वाचित भएका हुन् ।

उपाध्यक्ष पदमा पाँचजना निर्वाचित भएका छन् । पृथ्वी सुब्बा गुरुङले १ हजार ७ सय ३७, विष्णु प्रसाद पौडेलले १ हजार ६ सय ७५, रामबहादुर थापा ‘बादल’ले १ हजार ५ सय १६, गोकर्णराज विष्टले १ हजार ३ सय ६८ र रघुजी पन्तले १ हजार २ सय ५८ मत प्राप्त गरे । उपाध्यक्षमा निर्वाचित विष्ट पोखरेल प्यानलका हुन् । उपाध्यक्ष पदका प्रत्यासी ओली प्यानलका गुरुप्रसाद बराल पराजीत भएका छन् भने पोखरेल पक्षका बिन्दा पाण्डे, परशुराम मेघी गुरुङ, अरुण नेपाल, टंकप्रसाद कार्की र भीमप्रसाद आचार्य पराजित भए ।

यसैगरी उपमहासचिव पदमा लेखराज भट्ट, रघुवीर महासेठ र योगेश भट्टराई निर्वाचित भएका छन् । भट्टले १ हजार ४ सय ५२, महासेठले १ हजार ३ सय ६८ र भट्टराईले १ हजार ३ सय ४८ मत प्राप्त गरे । योगेश पोखरेल प्यानलबाट निर्वाचित भएका हुन् । ओलीका विश्वास पात्र विष्णु रिमाल पराजीत भए। यस्तै पोखरेलपक्षका आनन्द प्रसाद पोखरेल, वैजनाथ चौधरी र राजेन्द्रप्रसाद गौतम पनि उपमहासचिवमा पछि परेका छन् । 

सचिव पदमा भने सबै नौ जना ओली प्यानलबाट निर्वाचित भएका छन् । लोकप्रिय मतमा सबैभन्दा अगाडि महेश बस्नेत रहे । बस्नेतसंगै पद्माकुमारी अर्याल, छविलाल विश्वकर्मा, शेरधन राई, हिक्मतकुमार कार्की, खगराज अधिकारी, यमलाल कँडेल, राजन भट्टराई र भानुभक्त ढकाल सचिवमा विजयी भए । बस्नेतले सबैभन्दा बढी १५४४ मत ल्याए । यस्तै अर्यालले १५३०, विश्वकर्माले १५०६, राईले १५०३, अधिकारीले १२३१, कार्कीले १३३७, कँडेलले ११८५, भट्टराईले ११८१ र ढकालले ११०८ मत पाए ।

सचिवमा पोखरेल प्यानलका गोकुलप्रसाद बास्कोटा १०३० मत ल्याएर पनि पराजीत भए । पोखरेल प्यानलका ठाकुरप्रसाद गैरे, रचना खड्का, कर्णबहादुर थापा, अग्नि प्रसाद खरेल, विनोद प्रसाद ढकाल, कृष्ण गोपाल श्रेष्ठ, पेम्बा लामा, लाल बाबु पण्डित, इन्द्रलाल साप्कोटा र पुरुषोत्तम पौडेल पराजित भएका छन् । महाधिवेशनमा १९ मध्ये १७ पदाधिकारी ओली प्यानलबाट आएका छन् । ईश्वर पोखरेल प्यानलबाट उपाध्यक्षमा गोकर्ण विष्ट र उपमहासचिवमा योगेश भट्टराई मात्र विजयी भए ।