इतिहास बनाउन फेरी चुक्यो महिला फुटबल

काठमाडौ । अन्तिम १० मिनेट सम्हालिन नसक्दा नेपालले वुमन्स साफ च्याम्पियनसिप फुटबलमा इतिहास बनाउन चुकेको छ । काठमाडौको दशरथ रंगशालामा बुधबार बेलुका भएको प्रतियोगिताको फाइलनमा डिफेन्डिङ च्याम्पियन बंगलादेशले नेपाललाई पराजित गर्दै उपाधि रक्षा गर्दा नेपाल इतिहास बनाउन चुकेको हो । 

कडा प्रतिस्पर्धा रहेको खेल ८० मिनेटसम्म १–१ गोलको बराबरीमा रहेकोमा ८१ औं मिनेटमा बंगलादेशकी खेलाडि रितुपोर्ना चक्माले उत्कृष्ट गोल गर्दा नेपाल बंगलादेशसंग २–१ ले पराजीत भएको हो । उत्कृष्ट प्रदर्शन गरेपनि साफ च्याम्पियनसिपको फाइनलमा पाँचपटक हारिसकेको नेपाली महिला टीमलाई यसपाली घरेलु मैदान र दर्शककावीच इतिहास रच्ने मौका थियो । सेमिफाइनलको सनसनीपूर्ण खेलमा सशक्त दाबेदार भारतलाई पराजीत गरी फाइनल प्रवेश गरेकोले नेपालले उपाधी चुम्ने आशा बढेको थियो । 

पहिलो हाफ गोलरहित बराबरीपछि ५२ औं मिनेटमा नेपाली डिफेन्सको कमजोरीको फाइदा उठाउँदै बंगलादेशकी मोनिका चक्माले पहिलो गोल गरिन् । ४ मिनेटपछि नै नेपालले बराबरी गोल फर्काएर खेललाई थप प्रतिस्पर्धात्मक बनाएको थियो । प्रिति राईको पासमा अमिशा कार्कीले बंगलादेशी गोलरक्षकलाई कुनै अवसर नदिई गोल गरिन् ।

पहिलो हाफमा बंगलादेशले सुरुमै मौका पाएको थियो । नेपाली डिफेन्डर गीता राना चिप्लिएको स्थितिमा सिर्जना भएको अवसरमा सविता खातुनको पोस्टमा लागेको थियो । यस्तै खेलको दसौं मिनेटमा नेपालका सावित्रा भण्डारीको पासलाई नियन्त्रण लिएर अमिशाले गरेको प्रहार पोस्टमा ठोकिएको थियो ।

दुवै टोलीले गोल गर्ने केही अवसर पाए पनि सदुपयोग गर्न सकेनन् । दुवै टोलीको एक–एक प्रहार बारमा लागेको थियो । पहिलो हाफको सुरुवाती केही मिनेटपछि नै नेपालले खेलमा दबाब बनाएको थियो । दोस्रो मिनेटमै नेपालको गल्तीमा बंगलादेशले राम्रो अवसर पाएको थियो । १९ औं मिनेटमा नेपालकी अमिशा कार्कीले बक्स बाहिरबाट हानेको शक्तिशाली प्रहार बारमा लागेर फर्कंदा नेपालले अग्रता लिने अवसर गुमाएको थियो ।

३३ औं मिनेटमा बंगलादेशले बक्स नजिकै फ्रिकिक पाएको थियो । तर मोनिका चक्माको प्रहार पोष्टभन्दा बाहिर गयो । ६१ औं मिनेटमा नेपालकी सावित्रा भण्डारीले बायाँ साइडबाट हानेको बल पोष्ट नजिकबाट बाहिर गएको थियो । खेलको अन्तिम सम्मपनि नेपाली खेलाडिहरुले खेललाई आफ्नो पक्षमा पार्ने प्रयास गरेपनि सफल हुन सकेन । 

खेल सकेलगतै प्रधानमन्त्री केपी शर्मा ओलीले साफ महिला फुुटबलको उपाधि जित्न नसके पनि नेपाली खेलाडीले उत्कृष्ट खेलेको भन्दै प्रशंसा गरेका छन् । फाइनल खेल हेर्न रंगशाला पुगेका प्रधानमन्त्री ओलीले सामाजिक संजालबाट अब अर्काे खेल जित्ने गरी मेहनत गर्ने विश्वास व्यक्त गर्दै नेपाली टोलीलाई धन्यवाद दिएका हुन् । 

तस्बीरः दिनेश भण्डारी/प्रधानमन्त्री सचिवालय