दशैं शुरु, टुडिखेलमा फूलपाती बढाई (फोटोफिचर)

काठमाडौ । हिन्दु धर्मावलम्बिहरुको महानचाड बडादशैं आजबाट औपचारिक रुपमा शुरु भएको छ । असत्यमाथि सत्यको विजयको रुपमा मनाउने दशैं घटस्थापनाको दिन घरघरमा जमरा राखेर शुरु भएपनि फुलपातीको दिनबाट भने औपचारिक रुपमा दर्शै शुरु भएको मानिन्छ । फूलपातीको दिनबाट नेपालमा सबै सरकारी कार्यालय, उद्योगधन्दा तथा शैक्षिक संस्था पूर्णिमाको दिनसम्म बन्द रहनेछ ।  

दशैं मनाउने क्रममा रोजगारीको सिलसिलामा परदेश र अन्य ठाँउहरुमा बस्दै आएकाहरु आफ्नो घर पुगेर परिवारसंग खुशीयालीकासाथ चाड मनाउने गर्दछन् । काठमाडौबाट मात्रै ६ लाख भन्दाबढी व्यक्तिहरु दशैंं मनाउन उपत्यकाबाट बाहिरिएका छन् । दशैंको बेला घटस्थापनादेखि नवमीसम्म शक्तिस्वरुपा दुर्गा भवानीको विभिन्न स्वरुपहरुको पूजा आरधाना गर्ने चलन रहेको छ भने दशमीका दिन विजय दशमीको रुपमा मान्यजन र ठूलाबडाको हातबाट टीका जमरा राखी आशिर्वाद लिने चलन छ । 

यसैवीच विहीबार दिउसो नेपाली सेनाले काठमाडौको टुडिखेलमा फुलपाती बढाई गरेको छ । गोर्खा दरबारबाट ल्याएको फूलपातीलाई आज काठमाडौमा भित्र्याइने चलन छ । यस अवसरमा टुडिखेलमा फूलपाती बढाईको आयोजना गरिएको हो । समारोहमा राष्ट्रपति, प्रधानमन्त्री लगायत विशिष्ट व्यक्तिहरुले फूलपाती बढाईको अवलोकन गरेका थिए ।   

                                                                                            तस्बीरहरुः दिनेश भण्डारी